Ташқи меҳнат миграцияси агентлиги карантин сабабли вақтинча ишсиз қолган фуқароларга муҳим маълумотларни ҳавола этди. Улар билан қуйида танишишингиз мумкин:
"Дунё бўйлаб коронавирус инфекциясининг тарқалиши бошқа давлатлар каби Корея Республикасига ишлаш учун кетиши лозим бўлган фуқаролар билан боғлиқ муаммоларни юзага келтирмоқда.
Хусусан, 2020 йил 1 мартдан Ўзбекистон Республикаси Транспорт вазирлиги томонидан Корея Республикасига авиақатновлари, 16 мартдан эса Республика махсус комиссияси қарорига кўра, ҳар қандай транспорт туридан қатъи назар фуқароларнинг Ўзбекистон Республикасига кириш ва чиқиши вақтинчалик тўхтатилгани, вилоят ва шаҳарлараро ҳаракатланишнинг чеклангани сабабли шартнома лойиҳалари келган фуқароларни март-апрель ойларида Кореяга ташкилий жўнатишнинг имкони бўлмади.
Шу билан бирга, Корея Республикаси Бандлик ва меҳнат вазирлигининг хорижий меҳнат департаменти тақдим этган маълумотларига кўра, мамлакатда пандемия сабабли маҳаллий аҳоли, айниқса, чет элдан кириб келувчи фуқаролар учун ҳам қатор чекловлар жорий этилган.
Биринчидан, Корея Республикаси ҳукуматининг қарори билан мамлакатга кириб борган барча фуқароларнинг 14 кунлик мажбурий карантинда ўзини ўзи яккалаши белгиланган. Агар фуқаро яшаш жойига эга бўлса, бироқ жой карантин талабларига жавоб бермаса, кунига 100 минг вон (81 АҚШ доллари) эвазига давлат белгилаб берган жойда карантинга олинади. Агар фуқаро иш берувчи билан келишган ҳолда ўз-ўзини изоляция қилиш шароитига эга бўлмасдан, ёлғон маълумотлар билан мамлакатга кириб борса, ўз ҳисобидан депорт қилинади ва жаримага тортилади.
Маълумот ўрнида таъкидлаш жоизки, апрель ойида Индонезиядан Кореяга ишлаш учун борган фуқаролар белгиланган карантин чекловларига тўлиқ риоя қилмагани учун мамлакатдан депорт қилинган.
Бугунги кунда жаҳонда коронавирус билан касалланганлар сони 4 миллион 350 мингга етиб, вафот этганлар сони 300 мингдан ошди. Жанубий Кореяда эса 11 мингдан ортиқ инсон ушбу касалликка чалиниб, уларнинг 263 нафари вафот этган. Бундан ташқари, Кореяда пандемия бутунлай бартараф этилмаган ва охирги кунларда коронавирусга чалинган беморлар сонида ўсиш ҳам кузатилган. Бу Кореяга боришни режалаштираётган фуқаролар соғлиғини тўлиқ кафолатламайди.
Касалликнинг аниқ давоси йўқлиги сабабли ундан халос бўлиш ва бошқа инсонлар саломатлигини таъминлаш учун ўзини ўзи яккалаш энг мақбул йўл экани мутахассислар томонидан таъкидланмоқда.
Иккинчидан, Кореяда 1 апрелдан бошлаб жорий этилган карантин чоралари етарлича самара бермагани сабабли 6 майдан карантин чоралари янада кучайтирилди. Хусусан, EPS тоифасидаги, яъни ишлаш рухсатига (E-9) эга фуқаролар олдиндан карантинга розилик битимини расмийлаштириши, Тошкент шаҳридаги алоҳида марказда тиббий кўрикдан, шунингдек, коронавирус текширувидан ўтиши, тиббий текширувдан ўтгандан кейин икки кун муддатда ҳужжатларни элчихонага топшириши, иш берувчи томонидан ишчиларнинг Кореяга келишидан аввал карантин учун жой ташкиллаштирилиши талаб этилмоқда.
Ўз-ўзини изоляция қилишни тасдиқлаш розилик битими EPS марказига, ундан HRD марказига, рўйхатдан ўтган манзиллар текширилгач, яна EPS марказга қайтиб, шундан сўнг авиачипта харид қилишга рухсат берилади. Кореяга кириб боргандан сўнг карантинга розилик битимининг нусхаси талаб этилади.
Карантин чоралари кучайтирилганлиги сабабли Корея Республикасининг Тошкентдаги элчихонасида ҳам 11 майдан бошлаб барча виза турлари, шу жумладан, Е-9 визасини расмийлаштириш жараёни мураккаблаштирилган.
Карантин даврида фуқароларни бир жойда тўплаш чеклангани сабабли Ташқи меҳнат миграцияси агентлиги томонидан 215 нафар фуқаро онлайн тарзда кўниктириш ва ўқитишдан ўтказилди.
Корея инсон ресурсларини ривожлантириш хизмати билан музокаралар олиб борилиб, виза муддати ўтган ёки иш берувчи томонидан меҳнат шартномаси бекор қилинган (аввал Корея Республикасида миграция қонунларини бузмаган) фуқаролар учун қайта танловлар базасида иштирок этиш имконияти яратилишига эришилди.
Корея Республикасида ишлаш давомида меҳнат таътили ёки иш жойини ўзгартириш таътили даврида Ўзбекистонга қайтган ва ҳозирги кунда карантин сабабли Кореяга қайтиб бора олмаётган фуқароларнинг рўйхати шакллантирилиб, уларнинг виза муддатларини 50 кун муддатга узайтиришга эришилди.
Бундан ташқари, Президентимизнинг 2020 йил 19 мартдаги “Коронавирус пандемияси ва глобал инқироз ҳолатларининг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар тўғрисида”ги фармонига асосан коронавирус пандемиясининг меҳнат бозорига, меҳнат муносабатлари ва аҳоли бандлигига салбий таъсирини юмшатиш, ишсиз ва хорижга ишлаш учун кета олмаган, шунингдек, карантин давомида вақтинчалик ишсиз қолган фуқаролар бандлигига кўмаклашиш бўйича ҳам мамлакатимизда манзилли чоралар кўрилмоқда.
Қўшимча маълумот олиш учун: 71 202-33-55
