Кўплаб хорижий давлатларда карантин тартиби эълон қилингани сабабли оғир шароитда қолаётган фуқароларимизни олиб келиш Ҳукуматнинг кун тартибидаги муҳим масалалардан бири бўлиб турибди, тўхтовсиз чартер рейсларни ташкил қилиш орқали минглаб фуқароларимиз Ватанга қайтарилмоқда. Олий Мажлис Қонунчилик палатаси депутати "Юксалиш" умуммиллий ҳаракати Раиси ўринбосари Бобур Бекмуродов бу борада ўз фикрларини баён этди.
Лекин, назаримизда бир неча ҳафталардан буён юзлаб фуқароларимизнинг Россия ва Қозоғистон чегарасида қолаётганликларини, уларнинг бизга қилаётган мурожаатларини кўриб кўрмаётганликка олаяпмиз.
Албатта, бу фуқароларимиз элчихона орқали, аввало ўз оилалалари саломатлигини ҳурмат қилган ҳолда давлат томонидан ташкил қилинаётган расмий йўллар билан қайтишлари керак эди. Аммо бу ижро ҳокимиятида мазкур масала бўйича кузатилаётган чорасизликни оқлай олмайди – ҳар қандай вазиятда Ўзбекистон фуқароларига ғамхўрлик кўрсатиш, уларнинг ҳаётий манфаатларини ҳимоя қилиш керак.
Ҳукумат таркибида Хорижда вақтинчалик меҳнат фаолиятини амалга ошираётган Ўзбекистон Республикаси фуқаролари ҳуқуқини ҳимоя қилиш департаменти мавжуд. Мазкур тузилманинг қайтишга мажбур бўлган фуқароларимизни олиб келиш бўйича аниқ режаси борми? Улар бир неча ҳафтадан бери очиқ дала шароитида қолиб кетаётган фуқароларимизни қайтаришга тўғридан-тўғри масъул бўлган ташкилот сифатида қандай ечим таклиф қилади?
Бизнингча, қисқа муддатлар ичида биринчи навбатда эвакуацияга муҳтож бўлган фуқароларимизни рўйхатини шакллантириш ва уларни қайтариш бўйича аниқ режалар эълон қилиниши керак.
Бундан ташқари, хорижда бўлиб турган фуқароларимизни давлат томонидан қўллаб-қувватлаш бўйича ёндашувлар ҳақида ҳам маълумот берилиши керак.
Ўз навбатида, ватандошларимиз ҳам ҳукуматнинг бу борадаги ҳаракатларини қўллаб-қувватлашлари, чекланган имконият шароитида эътиборни бирламчи эҳтиёжи бўлганларга берилишини тушунишлари керак бўлади.
