Интернет тармоғида ёшлар ўртасидаги келишмовчилик видеоси тарқалди: унда бир томон бошқаси минаётган машинага яқинлашиб, ундан чиқишни талаб қилиб автомобиль корпусини тепганлари кўриниб турибди.
Мазкур ҳолат юзасидан Тошкент шаҳар ИИББ қуйидагиларни маълум қилди:
Видеодаги ҳодиса 21 июнь куни тахминан соат 21.15 да Миробод тумани Истиқбол кўчасида рўй берган. 23 ёшли Александр Д. “Нексия-3” русумли автомобилда 22 ёшли Гайдар А. билан бирга бўлган. Уларнинг ёнларига бир неча киши келиб, машинадан чиқишларини талаб қилишган, рад жавобини эшитгач эса машинани тепа бошлашган.
Ушбу ҳудудда хизмат олиб борган ППХ ходимлари 24 ёшли Улуғбек М. ва 18 ёшли Ўктам Ж.ларни аниқлаб, қўлга олишди. Қонуний чора кўрилиши учун ёшларни холислар иштирокида ва ҳодиса гувоҳлари билан бирга Миробод тумани ИИО ФМБ 2-сон ички ишлар бўлимига олиб келишган. У ерда маълум бўлишича, ёшлар орасидаги келишмовчилик бир неча кундан буён давом этиб келмоқда.
Аниқланишича, ҳодиса иштирокчилари илгарироқ телефон орқали жанжаллашиб, учрашишга келишганлар. Учрашув вақтида юзага келган келишмовчилик тасвирга олиниб, интернетга жойланган. Яқин атрофда хизмат қилиб юрган ППХ ходимлари келишмовчилик иштирокчиларини воқеа жойида қўлга олишди.
Ҳозирги вақтда Александр Д.нинг аризаси бўйича текширув олиб борилмоқда.
