3 июль соат 06:34ларда “Қамчиқ” қутқарув отряди диспетчерига келиб тушган маълумотга кўра, А-373 “Тошкент-Ўш” автомобиль йўлида “Тошкент-Водий” йўналишида ҳаракатланган “Nexia” ҳайдовчиси бошқарувни йўқотиб, шу йўналишдаги олд томонда ҳаракатланиб кетаётган “DAF” русумли юк машинасининг орқасидан келиб, тўқнашув содир этган. Бу ҳақда ФФВ хабар бермоқда.
Содир бўлган йўл-транспорт ҳодисаси оқибатида “Nexia” русумли автомашина ҳайдовчиси ва йўловчи ўрта даражадаги тан жароҳати олишган.
Воқеа жойига зудлик билан кичик сержант М.Бойчаев бошчилигида 3 нафар қутқарувчи етиб бориб, йўл-патрул хизмати, тез-тиббий ёрдам хизмати ходимлари билан ҳамкорликда тан жароҳати олган ҳайдовчи ва йўловчига биринчи ёрдам кўрсатишган.
Жабрланувчилар Ангрен шаҳар марказий шифохонасига юборилган.
"Қутқарувчиларимиз томонидан ўз вақтида кўрсатилган биринчи ёрдам натижасида 2 нафар фуқаронинг ҳаёти сақлаб қолинди" дейилади хабарда.
