АҚШнинг Калифорния штати Гурон шаҳрида ўт ўчирувчилар мўрига тиқилиб қолиб, вафот этган кишини чиқариб олди. Бу ҳақда “Lenta.ru” хабар бермоқда. Вафот этган киши ўғри бўлган бўлиши мумкинлиги тахмин қилинмоқда.

28 ноябр шанба куни уй эгаси каминни ёққан ва мўридан кимнингдир бақиргани эшитилган.  Мўрида кимдир борлигини пайқаган уй эгаси тезда печни ўчирган ва ўт ўчирувчиларни чақирган.“Вафот этган кишининг мўри ичида қанча вақт бўлганини аниқ билмаймиз. Уй эгаси нарсаларига кимдир тегинганини ҳам айтди. Тахмин қилишимизча, у мўри ичига ўтган куни кечаси кириб олган”, —деди полициячи. Ўт ўчирувчилар етиб келишганида ўғри вафот этган эди.  Маълум бўлишича, 19 ёшли  Коди Колдуэлл тутундан заҳарланиш оқибатида ҳалок бўлган. Сўнгги вақтда айнан шу ҳудудда жойлашган уйларда бир неча марта ўғрилик содир этилиши ҳолатлари қайд этилган. Полиция вафот этган ўғрининг бу ишларга алоқаси бор ёки йўқлигини ўрганмоқда.