2020 йил 1 сентябрь куни Суперлига 14-туридан ўрин олган «Навбаҳор лочинлари» - «Пахтакор» футбол клублари ўртасида учрашув бўлиб ўтди.
Ўз ПФЛ хабарига кўра, футбол учрашувларига карантин чекловлари туфайли мухлислар киришига рухсат берилмаган бўлса-да, «Навбаҳор лочинлари» футбол клуби мазкур учрашувда стадионга мухлислар киритишган. Шу билан бирга мухлислар томонидан меҳмон жамоа аъзолари ва ҳакамларни ҳақорат қилиш ҳолатлари ёзиб олинган видеолавҳалар ижтимоий тармоқларда тарқалган.
Шунингдек, «Навбаҳор лочинлари» футбол клуби томонидан COVID-19 пандемияси даврида чеклаш тадбирларини қўллаш шароитида профессионал футбол машғулотлари ҳамда мусобақаларни ташкил қилиш тўғрисидаги вақтинчалик санитария-гигиена қоида ва меъёрларининг 4.23-банди, шунингдек, Интизом кодексининг 5.38, 5.40-бандлари бузилганлиги аниқланган.
Ушбу ҳолатни кўриб чиқиш учун Ўзбекистон футбол ассоциациясининг Этика қўмитасига тақдимнома юборилди», - дейилади ПФЛ расмий сайти хабарида.
