Италия тарихида тўрт марта Бош Вазирликка сайланган Силвио Берлускони коронавирусга чалинди ва айни пайтда уйида изоляцияга олинди. Бу ҳақда унинг шифокори 2 сентябрь куни хабар берди, деб ёзмоқда торжумон.
83 ёшли Берлусконининг шахсий шифокори Аберто Зангриллонинг айтишича, Берлусконида CОVID-19 аломатлари мавжуд бўлмаган. Шундай бўлсада, у Сардинияга қилган сафаридан кейин текширувдан ўтишга қарор қилган.
Берлускони яқин кунлар ичида Ўрта Ер Денгизидаги Сардиния оролига дам олгани борганди. Бу оролда август ойида коронавирусга чалинганлар сони кескин кўтарилди. Бунга Сардинияга Италиянинг барча ҳудудларидан сайёҳлар келиб, одамлар гавжумлашгани сабаб бўлди.
Берлускони Милан яқинида жойлашган Аркордаги уйидан туриб ишлашни давом эттиради.
Европадаги коронавирусдан энг кўп зарар чеккан давлатлардан бири бўлган Италияда ҳозиргача 270 мингдан ортиқ одам касалланди ва 35 500 киши бу вирус қурбонига айланди. Бу мамлакатда коронавируснинг авж нуқтаси март ва апрель ойларида юз берганди. Шундан кейин ҳукумат вирус тарқалишини камайтиришга муваффақ бўлди.
Лекин, Италияда август ойида янги касалланишлар ҳоллари яна кўпая бошлади. Экспертлар эпимидиологик вазиятнинг ёмонлашиши одамларнинг байрам ва таътиллар муносабати билан кўпчилик бўлиб тўпланишларининг оқибати эканини таъкидлашмоқда.
