Бир неча соатлар ичида ижтимоий тармоқларда қизғин муҳокамага сабаб бўлаётган “қўшфамилиялилик” тушунчасига Адлия вазирининг Матбуот котиби томонидан баёнот берилди.
Аввало, бу тушунча бугун турли сайтлар жар солаётганидек “қайноқ” янгилик эмас, дейди ўз баёнотида Матбуот котиби.
Эринмасангиз қуйидаги манзил орқали Ўзбекистон Республикаси Вазирлар Маҳкамасининг 2016 йил 14 ноябрдаги 387-сон “Фуқаролик ҳолати далолатномаларини қайд этиш қоидаларини тасдиқлаш тўғрисида”ги Қарорининг 90-банди иккинчи хатбошиси билан танишиб чиқиш таклиф этилган.
Унда шундай ёзилган:
“Никоҳ тузилганлигини қайд этишда никоҳланувчи шахслар ўз хоҳишларига кўра иккаласидан бирининг фамилиясини умумий фамилия сифатида танлашлари ёки ўзларининг никоҳгача бўлган фамилияларида қолишлари мумкин.
Никоҳланувчилар фамилияларининг қўшилиши орқали ҳосил бўлган фамилия умумий фамилия сифатида танланиши мумкин”.
Бу тартиб ихтиёрийликка асосланган бўлиб, фуқароларнинг эркин танлови асосида амалга оширилади.
Адлия вазирининг Матбуот котибининг берган баёнотида Давлат хизматлари агентлигининг муҳокамаларга сабаб бўлган қонунчиликка киритилган янги ўзгаритиш ҳақидаги хабарида фамилияларининг қўшилиши орқали ҳосил бўлган фамилия нима эканлигига аниқлик киритилгани айтилган.
