АОКАда бўлиб ўтган брифингда муҳим саволларга жавоб қайтирилди.
Савол: Коронавирусга чалинган инсон ўзи рўйхатдан ўтган худуддан ташқарида бўлиб туриб, қандай қилиб касаллик варақасини очиши мумкин?
–Бу саволга Коронавирусга қарши кураш штаби аъзоси Севара Убайдуллаева қуйидагича жавоб берди:
Бу ҳолатда, яшаш жойингиздан ташқарида бўлишингизни вақтинчалик ёки доимий характеридан келиб чиқиб турлича бўлади.
Агар сиз доимий рўйхатдан ўтган яшаш жойингизда яшамай, бошқа жойда вақтинчалик прописка билан яшасангиз, унда шу вақтинчалик рўйхатдан ўтган ҳужжатингиз асосида яшаб турган жойингиздаги КТМП, ОП, ҚОП, ҚВПларда рўйхатга туришингиз лозим. Коронавирус билан касалланиб қолган даврингизда касаллик варқасини очишда муаммолар бўлмайди.
Агар сиз тиббиёт муассасасига мурожаат этмаган ва рўйхатга турмаган бўлсангиз ҳам, вақтинчалик рўйхатдан ўтганлик ҳужжатлари асосида касалликни биринчи кундан мурожаат этасиз, шу даврда ҳам сизга касаллик варақаси очилади.
Агарда сиз вақтинчалик бошқа ҳудудга мехмондорчиликка кетиб, шу ҳудудда касалланиб қолсангиз, сизга тиббий хизмат кўрсатилади, лекин касаллик варақасини яшаш жойингиздан очишингиз керак бўлади.
Касаллик варақаси (бюллетень) – касаллик бўйича мурожаат этилган кундан, аниқ касаллик аломатлари бўлган ҳолатда очилади. Касалланиб тузалиб келиб, қўлингизда шифохонанинг касаллик тарихидан кўчирма бўлса ҳам, орқа кун билан касаллик варақаси очилмайди.
