Америкалик олимларнинг фикрига кўра илгари болаларда аниқланган, COVID-19 билан боғланган ўткир яллиғланиш синдроми энди катталарда ҳам учраяти.
Беморларда нафас йўллари касалликлари бўлмаган, аммо юрак ва ошқозон-ичак тракти билан боғлиқ муаммолар кузатилган, деб хабар беради Forbes.ru.
COVID-19дан тузалган беморларда MIS-Cга ўхшаш MIS-A яллиғланиш синдроми пайдо бўлиши мумкин. Бу болалар ва ўспиринларда коронавирус туфайли юзага келадиган оғир асоратдир. Бу ҳақда АҚШ касалликларни назорат қилиш ва олдини олиш маркази ўзининг ҳафталик ҳисоботида маълум қилди.
Болалардаги синдромнинг аломатларига яллиғланиш жараёнига қўшимча равишда юрак муаммолари ва қорин оғриғи ҳам киритилган. Шунингдек, юрак-қон томир тизими ва ошқозон-ичак тракти билан боғлиқ аломатлар билан бирга дерматологик ва неврологик симптомлар билан мурожаат қилган 27 нафар ёши катта бемор ҳолати ҳақида маълум қилинган. Уларда ўткир нафас йўллари касаллиги кузатилмаган. Аммо коронавирусга топширган тести мусбат натижа кўрсатган. АҚШ касалликларни назорат қилиш ва олдини олиш марказининг таъкидлашича, синдромнинг қандай ривожланишини тушуниш учун қўшимча тадқиқотлар ўтказиш керак. Ҳозирча мутахассислар фақатгина COVID-19ни даволаш MIS-A каби оғир асоратнинг олдини олишга сабаб бўлиши мумкинлигини таъкидламоқда.
Мутахассислар 16 беморнинг ҳолатини батафсил баён қилмоқда. Гап АҚШ ва Буюк Британиялик 21 ёшдан 50 ёшгача бўлган 16 киши ҳақида кетмоқда. Уларнинг юрак-қон томир тизимида асоратлар, жумладан, аритмия борлиги аниқланди. Ўн икки нафар беморда юқори ҳарорат бўлган. Аммо MIS-A бошланишидан олдин атиги саккиз нафарида шамоллаш аломатлари кузатилган. Ўн нафар бемор интенсив терапияга ётқизилган, уларнинг икки нафари вафот этган.
Yuz.uz ёзишича, коронавирус билан оғриш ва MIS-A каби оғир асоратнинг пайдо бўлиши ўртасида қанча вақт ўтиши аниқ эмас. Шу сабабли, ноаниқлик кучаяди: синдром вирусли касалликнинг ўткир шаклда намоён бўлиши ёки “юқумли касалликдан кейинги жараён” бўлиши мумкин. Одатда COVID-19 белгилари ҳақида хабар берган беморларда ўртача 2-5 ҳафтадан сўнг MIS-A синдроми ривожланади.
