Қирғизистон собиқ президенти Алмазбек Атамбаев озодликка чиқарилган. Бу ҳақда «РИА Новости» ёзмоқда, дейилади "kun.uz" хабарида.
Қирғизистонда 4 октябрь куни бўлиб ўтган парламент сайловидан сўнг натижадан норози бўлганлар намойишга чиқишди.
Сайловда қатнашган 12 партиядан 11таси унинг натижаларини тан олишдан бош тортди. Ҳукмрон «Биримдик» партияси эса қайта сайловлар ўтказишга рози бўлган. Дастлабки натижаларга кўра, «Биримдик», «Мекеним Киргизстан», «Киргизстан» ва «Бутун Киргизстан» партиялари етарлича овоз тўплай олган.
Намойишчилар мамлакат парламенти биносига ҳужум уюштиришган. Вазият жиддий тус олиб, намойишчилар Қирғизистон миллий хавфсизлик қўмитаси биносининг дарвозасини синдириб, ичкарига киришган. У ерда мамлакат собиқ президенти Алмазбек Атамбаев сақланаётганди.
Олдинроқ намойишчилар парламент биносига ҳам бостириб киришган. Хавфсизлик қўмитаси биносига кириб борган намойишчилар Алмазбек Атамбаевнинг озодликка чиқарилишини талаб қилишган. Маълум бўлишича, уларнинг талаби бажарилган ва собиқ президент қўйиб юборилган.
Маълумот учун, 2019 йил августда қўлга олинган Алмазбек Атамбаев бир қатор жиноятларда айбланиб, 11 йил-у 2 ой қамоқ жазосига ҳукм қилинганди. Унга қўйилган асосий айблов сифатида криминал Азиз Батукаевни озодликка чиқариш келтирилганди. 2013 йилда 16 йил қамоқ жазосига ҳукм қилинган Батукаев муддати якунланмай туриб озодликка чиқарилган. Атамбаев президентликдан кетгач, бу иш борасида текширув бошланди. Атамбаев айбини тан олмагач, ҳарбийлар унинг уйига бостириб кириб, қўлга олишганди.
Интернетда Атамбаевнинг озод қилинишидан олингани айтилаётган видеолар тарқалди. Бишкек кўчаларида минглаб одамлар намойишларда қатнашди. Ҳозирча, ҳукумат бу борада расмий маълумот бергани йўқ.
