Ижтимоий тармоқларда Мирзо-Улуғбек тумани, "Оққўрғон" маҳалласида эр хотинини масхара қилгани, унга тан жароҳати етказганлиги ва ахлатни истеъмол қилишга мажбур қилганлиги тўғрисида маълумотлар эълон қилинган эди.
Шундан сўнг, Тошкент шаҳар ИИББ ҳолат юзасидан ушбу эркакка нисбатан жиноят иши очилганини хабар қилди.
Мирзо Улуғбек туман ҳокимлиги эса ушбу оиладаги муҳит ҳақида ахборот бериб, бугунги кунда аёл фарзандлари билан реабилитация марказига ётқизилганлигини, туман Маҳалла ва оилани қўллаб қувватлаш бўлими томонидан мунтазам назоратга олинганлигини маълум қилди.
Эр ва хотин ҳам воқеага нисбатан ўз изоҳларини беришди. Эркакнинг гапларига кўра, аёл болани "бўқи"га ботириб, ўзи телефон титкилаб ўтирган. Видеода акс этган ишни эр ғазабдан қилганлигини тан олган.
Аёлнинг таъкидлашича эса бундан уч-тўрт йил олдин ҳам худди шунга ўхшаган ҳолат бўлган.
Ўша пайтда аёл ажрашмоқчи бўлган, лекин маҳалла-куйнинг аралашуви билан ажрашиш аҳдидан қайтган. Фарзандларини тирик етим қилишни хоҳламаган. 1 октябрда эса зўровон эрининг исканжасида ҳеч қандай ёрдамсиз қолиб кетган. Ўлим таҳдиди остида ахлатни ейишга мажбур бўлган.
