Жорий йилнинг 13 октябрь куни соат 04:30 ларда, Сурхондарё вилояти, Бойсун тумани, Тўда МФЙ ҳудудидан ўтувчи 4R-105 автомобиль йўлининг 19-километрида ҳайдовчи, 1987 йилда туғилган С.О. “Ласетти” русумли автомобиль тезлигини меъёридан оширган ҳолда бошқараётиб, ўзидан олдинда бўлган транспорт воситасини қувиб ўтиш мақсадида қарама-қарши йўналишга чиқиб ҳаракатланган вақтида қаршисидан келаётган ҳайдовчи, 1994 йилда туғилган Ж.Х. бошқарувидаги “Кобальт” русумли автомобиль билан тўқнашган.
ИИВ ЙҲХББ Ахборот хизмати хабарига кўра, ЙТҲ натижасида, “Ласетти” русумли автомобиль ҳайдовчиси 33 ёшли С.О. ва “Кобальт” русумли автомобиль йўловчиси 30 ёшли А.И. оғир тан жароҳатлари олиб воқеа жойида вафот этишган. Шунингдек, “Кобальт” русумли автомобиль йўловчиси 31 ёшли Н.Н. тан жароҳати олиб шифохонага ётқизилган.
Мазкур ЙТҲ юзасидан Бойсун тумани ИИБ ҳузуридаги ТБ томонидан Ўзбекистон Республикаси Жиноят Кодексининг 266-моддаси 3-қисми “а” банди (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда тергов ҳаракатлари олиб борилмоқда.
Барча ҳайдовчилардан эҳтиёткор бўлишларини, тезлик меъёри ва қувиб ўтиш талабларига амал қилишларини, ўзи ва ўзгалар саломатлигини хавф остига қўймасликларини сўраб қоламиз.
