ЕХҲТнинг Ўзбекистондаги ваколатхонаси билан ҳамкорликда хорижда ишлаб келган меҳнат мигрантларини тадбиркорликка ўқитиш, ички меҳнат бозорига реинтеграция қилиш масалалари билан ишловчи меҳнат органларига методик кўникмаларни бериш юзасидан қисқа муддатли ўқув курслари ташкил этилган эди.
Режага кўра, мамлакатимиз бўйича 150 дан зиёд фуқароларни ўқитиш режалаштирилган. Ўқув курслари Тошкент шаҳридаги халқаро Вестминстер университетида юқори малакали тренерлар иштирокида олиб борилмоқда.
Бугун қисқа муддатли ўқув курсларини тугатган 50 нафар тингловчига сертификатлар топширилди. Бу ҳақда Ташқи меҳнат миграцияси агентлиги хабар қилди.
Эслатиб ўтамиз, хорижда ишлаб қайтган ва ўз тадбиркорлигини бошлаш истагидаги фуқаролар қисқа муддатли ўқув курсларида иштирок этиш юзасидан Ташқи меҳнат миграцияси агентлигига мурожаат қилишлари мумкин.
