Президент Доналд Трамп унга овоз берган сайловчилардан миннатдор.
“Бунчалик кенг қўллаб-қувватланамиз дея тасаввур қилмаган эдик”, - деди у, Оқ уйдан мурожаат қилар экан. Қатор штатларда сайлов натижаси ҳали эълон қилинмади.
Ҳозиргача маълум натижаларга кўра, демократ Жо Байден ва Президент Трампга берилган овозлар орасидаги фарқ катта эмас. Трампда 48 фоиз, Байденда 49 фоиз.
AҚШда ўтган бир ой мобайнида президентга берилган овозлар саналиб, натижа бирма-бир эълон қилинар экан, рақобат дақиқа сайин кескин.
Демократ Жо Байден ғалаба қозонишига ишонишини айтиб, халқни яна озгина сабр қилишга ундади.
"Ҳар бир овозни қадрлашимиз лозим. Сарҳисоб қилишсин, кутамиз", - деди Байден, Делавер штатидан қилган мурожаатида.
Сайлов коллегиясидаги 538 овоздан камида 270 тасини олган томон ютади.
Миллионлаб америкаликлар 3-ноябрдан 4-ноябрга ўтар кечани бедор ўтказиб, сайлов натижаларини кузатмоқда.
Aризона, Пенсилвания, Мичиган ва бошқа муҳим штатларда миллионлаб овозлар ҳали сарҳисоб қилинмаган.
Трамп бошидан почта орқали овоз беришга қарши бўлган. Ютқазса, Олий судга мурожаат қилиши мумкинлигини айтмоқда. Сабабини тушунтирмаган.
Сайлов мамлакат бўйлаб октабрь ойидан бошланган. 60 миллиондан ошиқ америкалик почта орқали ўз танловини билдирган. Қолганлар эса сайлов участкаларида эрта овоз берган. 3-ноябргача камида 100 миллион америкалик шу икки йўл билан сайловда қатнашиб бўлган эди.
Умумий ҳисобда қарийб 250 миллионлик электоратнинг 70 фоизидан ошиғи сайловга чиққан бўлиши мумкин, деб ёзмоқда Америка овози.
