Ўзбекистонда бир кишига ўртача 16 квадрат метр уй-жой майдони тўғри келмоқда

Ўзбекистонда сўнгги тўққиз йил ичида аҳолининг уй-жой билан таъминланиш даражаси 1 квадрат метрга ошди. Бу ҳақда Давлат статистика қўмитаси томонидан тақдим этилган маълумотларда келтирилган.

Мамлакатдаги жами турар-жойлар майдони 536,7 миллион квадрат метрни ташкил этган. Ўртача бир кишига тўғри келадиган уй-жойнинг умумий миқдори 2011 йилнинг 1 январига нисбатан 15 квадрат метрдан 16 квадрат метрга кўпайган.

Бир кишига тўғри келадиган уй-жой билан таъминланиш даражасининг энг юқори кўрсаткичи Хоразмда (24,5 квадрат метр), энг кичик кўрсаткичи эса Андижон (10,3 квадрат метр) вилоятларида қайд этилган.

Таққослаш учун, Қозоғистонда бир кишига 21,9 квадрат метр, Россияда — 25 квадрат метр, Беларусда — 26,8 квадрат метр, Арманистонда — 31,4 квадрат метр, Европада — 40 квадрат метр, АҚШ ва Канадада — 70 квадрат метрдан ортиқ тўғри келади. Аҳолиси энг кўп бўлган Хитойда ҳам юқори — 27 квадрат метр.