Май ойидан бери Сирдарё вилоятининг Сардоба, Оқ олтин ва Мирзаобод туманларига беш мартталар бордик. Бошқа вилоятларга сафар қилган чоғимизда эса йўл четида бунёд этилган “Янги Ўзбекистон” маҳалласи кўз ўнгимизда қисқа вақтда қад ростлаганини кўрдик. Хуллас, бу туманлар юртдошларимизннг ҳеч бирига бегона эмас. Одамлари эса бизга аллақачон таниш ҳам бўлиб қолган. Шундай таниш сингилларимиздан бири – Ширин Қуроқова. У бугун Сардоба тумани “Дўстлик” маҳалласида янги қурилган 5 қаватли уйларнинг бирига кўчиб ўтиб, маҳалласида жойлашган “Оқсарой текстил” корхонасига ишга ҳам кириб олган.
— Янги уйлар ва ишлар қуллуқ бўлсин, Ширин синглим!
— Раҳмат. Мана ишга ҳам, уйга ҳам кирволдик. Сизларга ҳам раҳмат, доим биздан хабар олиб турибсизлар...
— Янги уйлар маъқулми?
— Албатта. Маъқул демасак, ношукрлик қилган бўламиз. Бир хафта бўлди. Ишхонамга яқингина. 5 дақиқага қолмасдан кеволаман. Олдин узоқроқдан қатнаш қийин бўлаётганди. Хуллас, хурсандмиз! Сингилларим иссиққина уйда маза қилиб, ўйнаб ўтиришибди. 3 хонали уй беришди.
— Ўтган сафар гаплашганимизда 2 хонали уй беришади дегандингиз...
— Иккита синглим бор. Комиссия текширув ўтказиб, 3 хонали уй берадиган бўлишди. Бунданам кўра бир нарсага хурсандман – деразамиздан эски уйимиз ўрни кўриниб туради. Ўтган кунларимизни эслаб ўтирамиз.
— “Барибир ўзимизнинг эски уй яхши, хозир ҳудди бошқа шаҳарга кўчиб келаётгандекмиз” дегандингиз-ку?...
— Тўғри, шундай деган эдим. У пайти бунақа шароит бўлади, деб ўйламагандим. Янги иссиққина уй, барча маиший техникаси бор. 40 млн. сўмдан пул ҳам беришган. Мени ишга ҳам жойлаштиришди. Бизга яна нима керак? Олдин шаҳарликларга ҳавасимиз келарди. Энди шаҳарнинг ўзи маҳалламизда қурилди. Бошқа нарса керакмас бизга!
Маълумот учун, жорий йилнинг 1-май куни Сирдарё вилоятининг “Сардоба” сув омборида юз берган техноген ҳодиса оқибатида вилоятнинг Сардоба, Мирзаобод ва Оқолтин туманларида жами 4710 та хонадон зарар кўрган эди. Хозирга қадар 1850 та коттедж мукаммал таъмирланиб ўз эгаларига топширилгани ҳақида хабар қилган эдик. Шунингдек, уй-жойларига жиддий зарар етган фуқаролар учун 52,5 га ер майдони танланиб, жами 66 та, 2 640 та хонадонли кўп қаватли турар жойлар қурилиб битказилгани ҳақида ҳам маълумотлар берилган эди. Мана, икки хафтадан ошдики, янги кўп қаватли уйларига эга бўлганлар кўчиб келишмоқда.
“ГУЛИСТОН ШАҲАРНИ ТАШЛАБ, БУ УЙГА КЕЛИБ ОЛДИМ”
“Янги Ўзбекистон” маҳалласида қурилган кўп қаватли хонадонлардан бирига кўчиб кирган Кўпайсин ая Сулаймонова ҳам кенжа ўғлининг олдига Гулистондан қайтиб келганини айтади:
— Учта ўғлим бор. Тошқиндан биз, ўртанча ўғлим ва катта қизим зарар кўрган эдик. Ўғлим ва қизимнинг ховлисини аллақачон таъмирлаб беришган – ёзда қайтиб кўчиб киришганди. Биз эса чолим билан Гулистондаги катта ўғлимникига кетдик. Хўжайиним 2-гуруҳ ногирони. Биз иккала қарияларга шароит бўлмаса қийналамиз. 1 хафта олдин янги уйларимиз битиб, топширилиётганини эшитиб келдик. Хурсандлигимдан қанчалик йиғлаганимни кўрсангиз эди. Бизда ҳам шундай шароит қилса бўлар эканку?! 3 хонали, иссиққина, ҳамма шароити бор уйимизни беришди. Гулистон шаҳарни ташлаб, бу ерга кенжа ўғлимнинг ёнига келиб олдим. Қор ёғмасдан кириб олдик. Чунки бу ердаги шароит уёқдагидан ҳам яхши. Ҳам барча ўзимизнинг эски танишлар. Бир-бирларига кўчиб киришда ёрдамлашиб, чой ичгани меҳмонга чиқиб турибмиз. Қариганда бизга яна бошқа нима керак? Мен бу кунларимдан мингдан минг розиман!
Маълумот ўрнида: Олий Мажлис Қонунчилик палатасининг бир гуруҳ депутатлари ва Адлия вазирлиги вакилларидан иборат Ишчи гуруҳи иштирокида мазкур уй-жойларни аҳолига адолатли ва шаффоф тарзда топширилиши таъминланган. Бугунги кунга қадар Ишчи гуруҳи томонидан 2932 та оиланинг уй-жой олиш масаласида қилган мурожаатлари қабул қилинган бўлиб, мазкур мурожаатларнинг барчаси қариийб бир ой давомида ўрганиб чиқилган. Маҳалла фаоллари, қўни-қўшниларнинг фикр-мулоҳазалари ва муносабатлари инобатга олинган ҳолда Мирзаобод, Сардоба ва Оқолтин туманларида жами 1842 та хонадон ўз эгаларига топширилган. Шундан 1753 та хонадон эгалари ўз уйларига кўчиб киришган. Хонадонлар қай тарзда топширилгани ва муаммоли вазиятларга ечимлар ҳақида шу ерда маълумот берганмиз.
Кўпайсин аянинг кўзларида олдин айтганимиздек, “Маҳаллада дув-дув гап” кинофильмидаги Меҳринисо аянинг маҳорат билан кўрсатиб бера олган шукроналик ҳиссини кўриш қийин эмас эди. Уйларингиз муборак бўлсин!
Сардорбек Раҳмонқулов
