Жорий йилнинг 27 ноябрь куни соат чамаси 12:00 да Тошкент шаҳри Яшнаобод туманида жойлашган “Техноконтинентал” МЧЖ корхонасидаги ишлаб чиқариш жараёнида ишлатиладиган сиқилган газнинг сизиб чиқиши натижасида ёнғин юзага келган. Бу ҳақда Фавқулодда вазиятлар вазирлиги матбуот хизмати хабар берди.
Натижада воқеа жойида ишлаётган корхона ходимларидан бир гуруҳи термик жароҳат олган. Воқеа жойига ёнғинга қарши курашиш ходимлари етиб боргунига қадар корхона ходимларнинг саъй-ҳаракатлари билан ёнғин бартараф этилган.
Жароҳат олган ходимлар зудлик билан Республика шошилинч тез тиббий ёрдам марказига жойлаштирилганлиги маълум қилинди.
Айни пайтда ҳодиса рўй берган жойда вазиятни ўрганиш ва бартараф этиш учун Фавқулодда вазиятлар вазирининг биринчи ўринбосари бошчилигида тузилган республика ишчи гуруҳи фаолият олиб бораётгани айтилмоқда.
Корпоратив ахборот ягона портали келтирилган маълумотларга кўра, «Techno Continental» МЧЖ корхонасининг манзилида «Артел» бренди остида техникалар ишлаб чиқарувчи завод жойлашган. Корхона ва ташкилотларнинг ягона давлат регистри маълумотларида эса, мазкур МЧЖ таъсисчилари сифатида Artel Electronics (62,5%) ва Ilk Sabah Insaat Anonim Sirketi (37,5%)лар кўрсатиб ўтилган.
