Блогер о. Тўхтаназаров томонидан ижтимоий тармоқларда иштихон тумани қўнғирот қишлоғида яшовчи вояга етмаган болаларга тан жароҳатлари етказганлиги тўғрисидаги мақола юзасидан расмий баёнот берилди. О. Тўхтаназаров 2020 йил 08 декабрь куни ижтимоий тармоқларда Иштихон тумани, Қўнғирот қишлоғида яшовчи аёл ўзининг фарзандларини отасига ташлаб, Туркия давлатига кетганлиги, болаларнинг отаси уларга азоб берилаётганлик ҳолатига оид видео тасвир ва фото лавҳаларни жойлаштирган.
Иштихон туман прокуратураси ва тегишли ҳуқуқни муҳофаза қилувчи органлар томонидан олиб борилган суриштирув давомида вояга етмаган шахслар Иштихон тумани «Зартепа» МФЙ, Қўнғирот қишлоғида яшовчи 2015 йилда туғилган Д.Д. ва 2016 йилда туғилган Д.Н. эканлиги аниқланган.
Хабар берилишича, вояга етмаган шахсларнинг онаси Ш.В. 2019 йил апрель ойида фарзандларини турмуш ўртоғи Б.А. қарамоғида қолдириб, ўзи ишлаш мақсадида Туркия давлатининг «Измир» шаҳрига кетган, фарзандлари шу вақтдан буён отаси билан бирга истиқомат қилиб келишган.
Жорий йилнинг октябрь ойи охирларида вояга етмаган Д.Д. яшаш уйида гугурт билан ўйнаб, гилам ва бошқа тўшамаларни ёқиб юборганлиги оқибатида унинг синглиси Н.Д. елка соҳасидан куйиш тан жароҳатлари олган. Ушбу ҳолатдан жаҳли чиққан Б.А. фарзандларига танбеҳ берган ҳолда воқеани фото ва видеотасвирга олиб “Она меҳрига зор бўлиб хўрланган бола” деган ёзув билан турмуш ўртоғи Ш.В.га «Telegram» мессенжери орқали юборган.
Ҳозирги вақтда мазкур ҳолат юзасидан Иштихон туман ИИБ томонидан терговга қадар текширув ҳаракатлари олиб борилмоқда. Вояга етмаганларнинг танасида тан жароҳатлари мавжудлиги ва улар келиб чиқиш механизмини аниқлаш мақсадида суд-тиббий экспертизаси ўтказилиб, фарзандларнинг отаси Б.А. билан профилактик суҳбат олиб борилган.
Олиб борилаётган терговга қадар текширув Иштихон туман прокуратураси томонидан алоҳида назоратга олинган.
