2020 йил 1 ноябрь кунидан бошлаб Тошкент метрополитенида жетонлардан фойдаланиш тўхтатилиши, шунингдек йўл ҳақи тўловлари ягона транспорт карталари ва NFC банк карталари орқали амалга ошириш имкониятини берувчи стационар валидаторлар билан жиҳозланганлиги ҳақида хабар берилган эди.
Ҳозирги кунда метрополитен бекатларидаги кассаларда жетонлардан фойдаланиш тўхтатилиши муносабати билан бир марталик чипталар жорий этилган.
Бу, албатта тушунарли, фуқаролар Ягона тўлов картасидан фойдаланишга ўтгунга қадар бир марталик чипталар зарур. Лекин, ушбу чипталар олдинги жетонлардан фарқли ўлароқ индивидуал характерга эга, яъни ҳар бир бекат учун алоҳида чипта сотиб олишингизга тўғри келади.
Масалан, метронинг Амир Темур бекатидан сотиб олинган чипта билан Чилонзор ёки бошқа бекатларда ҳаракатлана олмайсиз.
Бу эса, ўз навбатида метрополитен йўловчилари учун айрим ноқулайликларни келтириб чиқармоқда.
Биринчидан, метпополитен кассалари олдида муайян бир бекатга кириш учун навбат кутаётган йўловчиларнинг узундан-узун қаторлари юзага келмоқда. Бу эса, ҳозирги совуқ об-ҳаво шароитида қулай ва хавфсиз транспорт воситаси бўлган метродан фойдаланишда ортиқча вақт сарфланишига сабаб бўлмоқда.
Иккинчидан, муайян бекатдан сотиб олинган чиптани фақат ушбу йўналишда ҳаракатланиш учун амал қилишини ҳамма йўловчилар ҳам билмаслиги мумкин.
Яъни, аксарият йўловчилар бекатларда шошилаётганлиги ёки эътиборсизлиги сабабли, бир марталик чиптада ёзилган ёзувга аҳамият бермайди. Шунга кўра, чипталарнинг фақат метронинг битта йўналишида амал қилишига доир маълумотлар метрополитен бекатларида жойлаштирилса ёки эълон қилиб борилса, йўловчиларнинг ушбу масаладаги хабардорлик даражаси янада ошган бўлар эди.
Юқорида қайд этилган муаммоларнинг тезкорлик билан ҳал қилиниши, метрополитендан фойдаланувчилар учун янада қулайлик ва имкониятлар яратади.
