Янги йил аввалида ва январ ойининг бошларида Туркияда комендантлик соати жорий этилади. Бу ҳақда республика президенти Ражаб Тоййиб Эрдўған Вазирлар Маҳкамасининг тўрт соатлик йиғилишидан сўнг маълум қилди.
Маълум қилинишича, комендантлик соати 31 декабрь соат 21:00 да бошлаб, 4-январ куни соат 5:00 гача давом этади. Туркия Президентининг сўзларига кўра, комендантлик соати коронавирус тарқалишига қарши кўрилган чора ҳисобланади.
"Илгари жорий этилган чекловлар ўзининг ижобий натижасини берди, касаллик юқтирганлар сони камайди", деди Туркия Президенти.
Сўнгги маълумотларга кўра, Туркияда пандемия бошланганидан бери 1,8 миллион киши коронавирус юқтирган, 16 мингдан ортиғи унинг асоратлари сабаб вафот этган.
