Ҳукумат қарори (783-сон, 15.12.2020 й.) билан “Судьялар ва уларнинг оила аъзолари пенсия таъминоти шартлари, меъёрлари ҳамда тартиби тўғрисида”ги низомга ўзгартиришлар ва қўшимча киритилди. Бу ҳақда Адлия вазирлиги хабар берди.
Унга кўра, эндиликда қуйидагилар ҳам судья лавозимида пенсия олиш ҳуқуқини берадиган иш стажига ҳисобга олинади:
● илгари судья лавозимида ишлаган шахсларнинг Олий суд аппарати раҳбари, бошқарма бошлиғи ёки Олий суднинг бошқарув ходимлари таркибига киритилган бошқа лавозимларда ишлаган даври;
● Судьялар олий кенгаши ҳузуридаги Судьялар олий мактабига ишга жалб қилинган ва малака даражаларига эга бўлган судьялар ва уларга тенглаштирилган шахсларнинг Судьялар олий мактабида ишлаган даври.
Шунингдек, эндиликда шахснинг Қонунчилик палатаси ёки Сенат қарори билан лавозимда бўлган даври ҳам судья лавозимида пенсия олиш ҳуқуқини берадиган иш стажига ҳисобга олинади (илгари фақат Президент ёки Ҳукумат қарори билан).
