Республика Савдо-саноат палатаси томонидан тадбиркорлар ўртасида тадбиркорлик фаолиятига тўсиқ бўлаётган коррупцион ҳолатлар бўйича ижтимоий сўровнома ўтказилди.
Сўровнома 2020 йил давомида Қорақалпоғистон Республикаси, вилоятлар ва Тошкент шаҳридаги тадбиркорлар ўртасида Палатанинг расмий телеграм канали орқали ташкил этилган.
Сўровномада тадбиркорлардан коррупцион ҳолатга тўқнаш келгани ёки келмагани сўралганда, респондентларнинг 69 фоизи коррупцион ҳолатга кўп маротаба, 9 фоизи бир маротаба тўқнаш келганлигини таъкидлаган бўлса, 22 фоиз тадбиркорлар умуман дуч келмаганлигини билдиришган.
“Қайси соҳада тадбиркор кўпроқ коррупцион муносабатларга киришишга мажбур бўлади?” деган саволга тадбиркорларнинг 30 фоизи ер майдони олишда, 21 фоизи кредит ажратилишида, 17 фоизи текширув ўтказилиш жараёнида, 9 фоизи лицензия олишда деб жавоб берган.
Сўровнома жараёнида берилган овозлар таҳлилига кўра, иштирокчиларнинг 54 фоизи охирги бир йил давомида тадбиркорлик фаолиятини амалга ошириш жараёнида мансабдор шахсларга норасмий тўлов ёки совға қилишга мажбур бўлганини таъкидлаган.
Қилинган совға ёки берилган маблағнинг миқдори сўралганда 38 фоиз тадбиркор 1 миллиондан 10 миллион сўмгача, 19 фоизи 100 минг сўмгача, 18 фоизи 1 миллион сўмгача деб берилган жавобларни танлашган бўлса, 15 фоиз тадбиркор 10 миллиондан 100 миллион сўмгача, 9 фоиз тадбиркор 100 миллион сўмдан ортиқ маблағ берганини билдирган.
Респондентларнинг 51 фоизи ўзи дуч келган коррупция ҳолатлари тўғрисида ҳеч қайси органга мурожаат қилмаган, 11 фоизи мурожаат қилишдан қўрқади, 7 фоиз тадбиркорларнинг мурожаати кутилган натижани бермаган. 19 фоиз тадбиркорлар коррупцияга дуч келмаганини билдирган.
“Қайси давлат органи мансабдор шахслари фаолиятингизни текшириш, ўрганиш билан қўрқитиш ёки масалангизни ҳал этишда коррупцион муносабатга киришишга мажбур қилган?” саволи бўйича ҳам мурожаат қилинган. 17 фоиз тадбиркорлар бу саволга ҳокимлик, 17 фоизи солиқ идоралари, 13 фоизи кадастр хизмати идоралари, 7 фоизи санитария-эпидемиология хизмати, 7 фоизи банклар, 6 фоизи прокуратура органлари дея жавоб қайтаришган.
P.S: Бу кетишда Ўзбекистонга учинчи Ренессанс даврида инвесторларнинг келишидан умид қилмасак ҳам бўлади.
