Олий Мажлиснинг уч нафар депутати йўл ҳаракати қоидалари бузилишига оид айрим жавобгарлик чораларини енгиллаштиришмоқчи. Уларнинг бу ташаббусини депутут Расул Кушербаев ҳам қўллаб-қувватламоқда.
"Депутатлар – Э.Салихов, Ф.Ашматов ва К.Тожиев ишлаб чиққан қонун лойиҳасида қуйидаги таклифлар илгари сурилган:
- Маъмурий жавобгарлик тўғрисидаги кодексга йўл ҳаракати хавфсизлиги соҳасидаги айрим турдаги қоидабузарликларга нисбатан базавий ҳисоблашнинг «энг кам» ва «энг кўп» миқдорда белгиланган жарималарнинг минимал даражасини қўллаш;
- такроран содир этилган баъзи ҳуқуқбузарликларга нисбатан жарималар миқдорини камайтириш;
- айрим ҳуқуқбузарликларга нисбатан жарималар миқдорини оқибатидан келиб чиққан ҳолда белгилаш.
Бундан ташқари, ҳукуматнинг айрим қарорларига ҳам қуйидаги ўзгартиш ва қўшимчалар киритиш назарда тутилмоқда:
- автотранспорт воситаларини рўйхатдан ўтган ҳудудидан қатъи назар, республиканинг исталган ҳудудида техник кўрикдан ўтказишга рухсат бериш;
- ҳайдовчилик гувоҳномаларини бериш жараёнларида инсон омилини камайтиришга қаратилган замонавий ахборот-коммуникация технологияларини кенг жорий этиш;
- ҳайдовчилик гувоҳномаларини йўқотган (ўғирланган, ёнғин, табиий офат оқибатида ва бошқа ҳолларда) шахсларга дубликат бериш тартибини соддалаштириш.
Ишлаб чиқилаётган қонун лойиҳалари Қонунчилик палатасига белгиланган тартибда киритилиб, сиёсий партиялар фракциялари муҳокамаларидан сўнг, Қонунчилик палатаси ялпи мажлисларида кўриб чиқилади.
Қонунчилик палатасининг Мудофаа-хавфсизлик қўмитаси депутатлари тўхташ ва тўхтаб туриш қоидаларини бузганлик учун жарималарни ҳам камайтирмоқчи.
Ҳамкасбларимиз бу таклифларни тез кунларда қонун лойиҳаси шаклида Қонунчилик палатасига киритиш устида ишлашмоқда.
Бундай ташаббусларга шахсан мен ҳам "за"!"-деб ёзиб қолдирган Кушербаев.
