Наманганда зўравонлар томонидан ўғирланган қиз вафот этди. Бу ҳақда Наманган вилоятидан мухбиримиз Умида Қўшоқова хабар берди.
Маълум қилинишича, жорий йил 20 декабрь куни соат 23:30ларда Норин туманида яшовчи 18 ва 23 ёшли икки йигит олдиндан жиноий тил бириктириб, спиртли ичимликдан маст ҳолда тумандаги Чангитма маҳалласи ҳудудидаги хонадонлардан бирида ижарада яшаб келаётган асли учқўрғонлик бўлган 16 ёшли қизнинг олдига боришади. Қиз билан унинг дугонаси ва йигитлардан бири ўртасидаги муҳаббат можароси хақида гаплашиб олишни ва бу масалада ёрдами кераклигини айтишади. Уни уйдан яширин ҳолда чиқишга кўндиришгач, "Дамас" автомашинасида ўғирлаб кетишган. Қиз эса улардан қутулиш мақсадида юриб кетаётган машинанинг эшигини очиб, ўзини ерга ташлаган.
"Дамас" ҳайдовчиси воқеа жойидан қочиб кетгач, йўлдан ўтиб кетаётган "Ласетти" ҳайдовчиси тўхтаб, жон талвасасида ётган қизни шифохонага олиб борган. Бироқ, кўрсатилган тез тиббий ёрдамга қарамай, жабрланувчи ўта оғир тан жароҳати билан шифохонанинг жонлантириш бўлимида вафот этди.
Мазкур ҳолат юзасидан Норин тумани Ички Ишлар бўлими ҳузуридаги тергов бўлинмаси томонидан Ўзбекистон Республикаси Жиноят кодексининг 117-моддаси 2-қисми ҳамда 137-моддасининг 3-қисми в банди билан жиноят иши қўзғатилган.
