Энергетика вазирлиги нега электр таъминоти учун мавжуд қарз тўлангандан сўнг, электр энергияси автоматик тарзда ишга тушмаслигига жавоб берди.
Қайд этилишича, ASKUE тизими истеъмолчиларнинг 100 фоизини қамраганидан сўнг тўлиқ тартибда ишлай бошлайди. Бугунги кунгача 72 фоиз истеъмолчиларга ушбу турдаги ҳисоблагичлар ўрнатилган. Ушбу тизимга тўлиқ уланиш 2021 йил апрелигача режалаштирилган.
«Айни пайтда электр истеъмоли бўйича қарз тўлангач, унинг таъминотини қўлда қайта тиклашга тўғри келмоқда. Бироқ ASKUE тизимига тўлиқ ишлашини узоқ кутишга ҳожат йўқ, чунки ҳозирда 5 миллион 307 минг 346 истеъмолчи замонавий ҳисоблагичлар билан таъминланган», — дея жавоб берди Энергетика вазирлиги.
Вазирликнинг маълум қилишича, ушбу ҳисоблагичларга эга 2,9 миллион (54 фоиз) истеъмолчи биллинг тизимига уланган, яъни тўлов амалга оширилгандан сўнг автоматик тарзда электр энергиясини қабул қилиш ишга тушади.
Эслатиб ўтамиз, 20 ноябрь куни Тошкент туманидаги қарийб 17 минг электр энергия истеъмолчиси томонидан фойдаланилган электр энергияси учун тўловлар бўйича юзага келган қарздорлик сабабли амалдаги тартиб бўйича ASKUE тизими автоматик равишда қарздор истеъмолчиларнинг таъминотини тўхтатган. Ўз навбатида юқоридаги ҳолат жойига чиқиб ўрганилганда истеъмолчилар томонидан фойдаланилган электр энергияси учун қарздорлик тўлангандан кейин ҳам автоматик равишда электр тармоғига қайта уланмаган ҳолатлар аниқланган.
Бу каби ҳолат 21—22 ноябрь кунлари Қибрай ва Зангиота туманларида ҳам кузатилган.
