Сешанба куни Байден коронавирус бўйича маслаҳатчилари билан ўтказган брифингдан сўнг мамлакатдаги эпидемиологик вазият тўғрисида баёнот эълон қилди. Ўтиш даври жамоаси вакилининг сўзларига кўра, сайланган президент яқин ҳафталарда мамлакатда ўлим ва касалланиш даражаси ошиши кутилаётгани ҳақида огоҳлантирди.
Байден ва унинг жамоаси бир неча бор вакцинани оммага тарқатиш учун кўп вақт кетиши кераклиги тўғрисида огоҳлантирган ва одамларни юқтиришдан сақланиш учун тиббий мутахассисларнинг маслаҳатларини тинглашга чақиришмоқда.
Байденнинг COVID-19 консультатив кенгаши аъзоси доктор Атул Гаванденинг сўзларига кўра, ўтиш гуруҳи вакцина тарқатишдаги тўсиқларни тушуниш учун зарур бўлган барча маълумотларга эга эмас.
Шунингдек, у 2021 йил июнь ойининг охирига қадар барчани эмлашни ваъда қилган ҳозирги маъмурият истиқболи жуда некбин бўлиши мумкинлигидан огоҳлантирди.
Шу каби ташвишларни ўтиш гуруҳининг бошқа аъзолари ҳам билдиришди.
Байден бош тиббиёт ходими этиб тайинланмоқчи бўлган доктор Вивек Муртининг айтишича, аҳоли ўртасида эмлашлар бошланиши учун янада аниқроқ муддат - ёзнинг ўртаси ёки кузнинг боши.
Ҳозир АҚШда иккита COVID-19 вакцинаси рўйхатдан ўтган, улардан бири Pfizer ва унинг немис шериги BioNTech SE томонидан ишлаб чиқарилган, иккинчиси Moderna томонидан ишлаб чиқарилган. Яна бир нечта вакциналар эса синов босқичида, дейилган хабарда. \
Эслатиб ўтамиз, аввалроқ, AҚШнинг янги сайланган президенти Жо Байден ва АҚШнинг сайланган вице-президенти Камала Харрис жонли эфирда COVID-19га қарши вакцина қабул қилди.
