Наманган шаҳрида янги қурилган кўприк синиб кетгани ҳақида хабар берган эдик.
Вилоят ҳокилигининг маълумотларга кўра, кўприк Давлатобод туманидаги Шимолий Фарғона канали устида қурилаётган бўлган. Ҳодиса бугун, 8 январь куни соат 11:00 атрофида рўй берган. Бунинг оқибатида қурбонлар ёки жабрланганлар бўлмаган.
Бунинг учун давлат бюджетидан маблағ сарфланмаган.
Кўприкни қурган тадбиркор Маъруфхон Ҳожихоновнинг таъкидлашича, бу ишга яқинда 90 ёшида қазо қилган отасининг васиятини амалга ошириш учун киришган.
—Дадамнинг васиятларига кўра “Ўн бир Аҳмад” зиёратгоҳига келадиганлар қийналмаслиги учун шу ишга қўл ургандим. Кўприк тайёр бўлганидан кейин шу атрофдаги автотураргоҳда бир ҳафта 5 тоннадан ошиқ юк қўйилган ҳолатда турди, қилт этмади. Кейин жойида синаб кўрдик. Ҳаво ҳарорати пасайиб, каналдаги сув оқими кўпайгани сабабли ҳали ишимиз охирига етмаган эди, — дейди Маъруфхон Ҳожихонов.
Тадбиркорнинг айтишича, кўприкнинг монтаж ишлари тўлиқ якунланмаган, икки томонига яна трос ва темир ўрнатилади.
Буларнинг барчасига икки ҳафта атрофида вақт талаб этилади. Шундан сўнг кўприк аввалги жойига мустаҳкам этиб ўрнатилади.
