Бугун Ўзбекистон Республикаси Судьялар олий кенгашининг навбатдаги йиғилиши бўлиб ўтди. Бу ҳақда кенгаш матбуот хизмати маълум қилмоқда.
Йиғилишда 5 йиллик ваколат муддати тугаган бир неча нафар судьяларни янги муддатга тайинлаш, шунингдек айримларини (ваколат муддатига) қайта тайинлаш масаласи кўриб чиқилди.
Тайинловга оид барча жараёнлар замонавий ахборот-коммуникация технологиялари воситасида очиқ-ошкора ўтди. Унда оммавий ахборот воситалари вакиллари ҳам ҳозир бўлди.
Судьялар олий кенгаши қарори билан 6 нафар номзод навбатдаги 10 йиллик муддатга, яна уч нафар судья ваколат муддатига қайта тайинланди, 2 нафари захирага қолдирилди. Захирада қолганларга бир ойдан кейин яна бир бор ўз омадини синаб кўриш имконияти берилади.
Шунингдек, кенгаш судьялик фаолиятида хато-камчиликларга йўл қўйган 4 нафар судьяни интизомий жавобгарликка тортиш масаласини ҳам муҳокама қилди.
Пировардида, уларнинг 3 нафарини интизомий жавобгарликка тортишга розилик берди, бир нафарига нисбатан рад этди.
Эслатиб ўтамиз, судьяларга нисбатан интизомий чоралари (Судьялар олий кенгаши розилик билдирганидан сўнг) тегишли малака ҳайъатлари томонидан қўлланилади.
