Қонунчилик палатаси депутати Расул Кушербаев Телеграмдаги шахсий саҳифасида "Теримнинг қалини - жонимни ҳузури" номли мақола эълон қилди. Депутат бу мақолада тадбиркорлик субъектлари орқали бюджет маблағларини ўғирлаш билан шуғулланиб келаётгани ҳақида ёзган.
Сўнгги вақтларда ҳудудлардаги айрим масъуллар: вилоят ҳокимлари, ўринбосарлари ва тендер ўтказишга масъул раҳбарларнинг "ўз чўнтаклари" сифатидаги тадбиркорлик субъектлари орқали бюджет маблағларини ўғирлаш билан шуғулланиб келишаётгани яшириб бўлмас даражага чиқди.
Бу ўзининг устун мавқесидан фойдаланиб қилинаётган очиқ ўғирлик. Бунинг бошқа шакли коррупция. Ўғирлик ва коррупция эса доимо жиноят ҳисобланган. Лекин негадир бу ишлар ҳозирча назорат органларига жиноят бўлиб кўринмаяпти. Ғалатимасми?
Энг ёмони бирор бир ҳудуд масъули бюджет маблағларини қариндош ва яқинлари орқали ўзлаштирилишини тайинли жавоб билан рад қилгани ҳам йўқ. Демак буларнинг бари рост ва улар буни инкор қилишмаяпти. Шунчаки без-бетлик: теримнинг қалини жонимни ҳузури, деганларидек.
Мазкур ҳолатга нафақат Коррупцияга қарши курашиш агентлиги, прокуратура балки парламент ва жамоатчилик ҳам жим қараб турмаслиги, бу каби ўғирлик ва коррупцияга тоқатсиз муносабатда бўлиши шарт.
Биз прокуратурадан бу ишлар бўйича тезкор чоралар кўрилишини кутиб кутамиз.
