Қозоғистон томони Туркистондан Тошкентга қадар тезюрар темир йўли қурилиши бошланиши ҳақида маълумот берган. Бу ҳақда euroasia.me сайти хабар берди.
Хабарга кўра, яқин муддатда Қозоғистон томонидан Туркистон-Чимкент-Тошкент тезюрар темир йўли қурилиши бошланади. Бу ҳақда Қозоғистон бош вазири Асқар Мамин ҳукуматнинг кенгайтирилган йиғилишида маълум қилган.
«Ушбу лойиҳа туризм соҳасида янги 22 минг иш ўрнини яратиб, сайёҳлар оқимини 50 фоизга кўпайтиришга ёрдам беради. Шунингдек, иқтисодиётнинг турдош соҳаларида 100 минг иш ўрни яратилади», – деди мамлакат бош вазири.
Маминнинг сўзларига кўра, айни пайтда Қозоғистонда ички туризм салоҳияти 4,5 миллион сайёҳни жалб этган. Туризмнинг ялпи ички маҳсулотдаги улуши 5,2 фоизни ташкил этган.
Аввалроқ, Туркистон-Чимкент-Тошкент тезюрар темир йўли қурилишини Ўзбекистон бош вазирининг ўринбосари – инвестициялар ва ташқи савдо вазири Сардор Умурзоқов ва Қозоғистон бош вазирининг ўринбосари Роман Скляр муҳокама қилган.
Эслатиб ўтамиз, Тошкент шаҳридан Қозоғистоннинг Жанубий Қозоғистон области маркази Чимкент шаҳрига автобус қатнови йўлга қўйилган.
