АОКАдаги брифингда Сардоба тошқинидан жабр кўрганларни турар-жой билан таъминлашда юзага келган муаммоли масалаларга изоҳ берилди.
Сирдарё вилояти ҳокими ўринбосари Ўлмасжон Мамадаминовнинг таъкидлашича, ишчи гуруҳлари томонидан уй-жойлар тақсимланишида биринчи навбатда ҳужжатларида муаммоси бўлмагани учун 1 430 та хонадон эгаларига тўғридан-тўғри берилиб, кўп қаватли уйларнинг 1-қаватига биринчи навбатда оиласида ногиронлиги бўлган болалар ёки оғир ногиронликка олиб келувчи касалликка чалинган болалар, шунингдек I ёки II гуруҳ ногирони бўлган шахслар ва ёлғиз пенсионерлар жойлаштирилган.
" - Муаммо ва камчиликлари бўлган 724 та ҳужжатлар Халқ депутатлари туман Кенгашлари сессияларида кўриб чиқилиб, сессия қарорларига асосан уй ажратилиши рад этилди.
Жумладан, ўрганишлар натижасида 187 тасини — яшайдиган уйи бўлгани учун, 232 та хонадонга тегишли уйлар — Қурилиш назорат инспекцияси томонидан яроқли деб топилгани, 4 та хонадон — нотурар жой бўлгани, 3 та хонадон — қурилиш қилиш мумкин бўлмаган жойда қурилгани ва 298 та хонадон — қурилиши якунланмаган (фақат пойдевори бўлган ёки 2-3 қатор ғишт кўтарилган), кадастр ҳужжатларини расмийлаштириш учун қурилган вақтинчалик уйлар (времянка) эканлиги аниқланди», - деди ҳоким ўринбосари.
