Венгрия Хитойнинг Sinopharm компанияси томонидан ишлаб чиқарилаётган коронавирусга қарши вакцинани тасдиқлади. Мамлакат Европа Иттифоқи давлатлари ичида биринчи бўлиб бундай қадамни қўйди. Бу ҳақда «Интерфакс» хабар берди .
«Миллий фармакология ва озиқ-овқат институти бугун Sinopharm вакцинасини маъқуллади», – деди Венгриянинг бош санитария шифокори Сесилия Мюллер.
Венгрия бош вазири Виктор Орбан кеча, 29 январь куни мамлакат Sinopharm вакцинасини сотиб олиш бўйича шартномани тез орада якунлашини маълум қилди. Шунингдек, бош вазир ушбу дори билан эмланишни режалаштираётганини ҳам таъкидлаган.
Маълум қилинишича, Будапешт Европа Иттифоқи дастури бўйича вакциналар жуда секин етказилаётганидан шикоят қилган. Мамлакатга ҳафтада 100 минг дозадан кам вакцина олиб келинмоқда. Шунинг учун Венгрия қўшимча равишда Россия ва Хитой вакциналарини сотиб олишга қарор қилган.
Sinopharm мамлакатга биринчи жўнатмадаёқ миллион доза вакцина етказиши мумкин.
Венгрияда пандемия бошланганидан бери деярли 365 минг киши коронавирус билан касалланган, уларнинг қарийб 12 мингдан ортиғи вафот этган.
