Янгийўлда 1-синф ўқувчисини ўғирламоқчи бўлган шахс қўлга олингани ҳақида хабар берган эдик.
Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов мазкур ҳолатга ўз муносабатини билдирди.
"Тошкент вилоятининг Янгийўл шаҳрида ўқувчи қизни ўғирламоқчи бўлган шахс Миллий гвардия томонидан қўлга олингани ҳақида маълумот берилди. Ундаги фотони кўриб ичларим титраб кетди. Бундай ифлосларни башарасини очиқ кўрсатиш керак. Нима учун қора қилиб беркитилган? Иккинчидан ушбу қизалоқни кўриб қолиб, бефарқ бўлмаган фуқаро Абдулазиз Обидов қизалоқни соғ-саломат таълим олаётган мактабига етказиб, синф раҳбарига топширгани қахрамонлик деб ҳисоблайман. Ҳурматли Абдулазиз Обидов- сизга минг тазим. Аллоҳ сиздек одамлар сонини юртимизда кўпайтирсин. Қизлари бор барча ота-оналар номидан минг раҳмат сизга ҳурматли Абдулазиз Обидов. Аслида сизнинг ушбу ҳаракатингиз учун давлат мукофоти берилиши керак. Сиз бундан юксак мукофотга лойиқсиз. Ҳурматли матбуот ходимлари ва блогерлар, сиздан катта илтимос, кўпроқ ёритайлик шундай қахрамонларни, зеро улар фақат ва фақат кўпайсин. Болаларга кўз олайтирган хайвонлар қамоқда чирисин. Дунёни манаман деган инсон ҳуқуқлари ташкилоти танқид қилса ҳам шу фикримда қоламан. Миллий гвардия ходимлари сизларга эса фақат респект. Бор бўлинг доим!!!",–дейди Алламжонов
