Халқаро рейтинг ва индекслар билан ишлаш бўйича республика кенгашининг навбатдаги йиғилиши бўлиб ўтди

 2021 йил 22 февраль куни Халқаро рейтинглар ва индекслар билан ишлаш бўйича Республика кенгашининг видеоконференцалоқа тизими орқали навбатдаги йиғилиши ўтказилди. Унда Кенгаш аъзолари, олий таълим ва илмий-тадқиқот муассасалари мутасаддилари иштирок этди.

 Йиғилишда Олий Мажлис Сенати Раиси, Республика кенгаши раиси Танзила Нарбаева Кенгаш фаолиятининг 2020 йил якунлари тўғрисида тўхталиб ўтди.

Жумладан, 2020 йилда мамлакатимиз учун устувор бўлган жами 13 та халқаро рейтингда Ўзбекистоннинг ўрни яхшиланганлиги, 3 та халқаро рейтингда илк маротаба эътироф этилганлиги қайд этилди.

Тадбирда вазирлик ва идоралар томонидан мамлакатимизнинг халқаро рейтинглардаги ўрнига таъсир қилувчи 12 та Қонун, 3 та Кодекс, 14 та Президент фармони ва қарори, 15 та Ҳукумат қарори лойиҳалари ишлаб чиқилганлиги, улардан 3 та Қонун, Президентнинг 7 та фармони ва қарори ҳамда Вазирлар Маҳкамасининг 4 та қарори қабул қилинганлиги таъкидлаб ўтилди.

Халқаро ва маҳаллий экспертлар иштирокида 20 дан ортиқ турли семинарлар, учрашувлар ташкил этилганлиги ҳамда “II Халқаро рейтинглар форуми”нинг аҳамияти алоҳида эътироф этилди.

Шунингдек, мамлакатимиз учун устувор бўлган рейтингларни ўзида мужассам этган “Ўзбекистон халқаро рейтингларда” ягона портали ишга туширилганлиги таъкидланди.

Йиғилишда ҳудудларнинг ҳуқуқ устуворлиги миллий индекси ишлаб чиқилганлиги, унга асосан эндиликда ҳудудларда ҳуқуқ устуворлиги ва қонунийликни таъминлаш, қабул қилинаётган қонун ҳужжатларининг ижросини ташкил этиш ҳолати ўрганилиши ҳамда жамоатчиликка эълон қилиб борилиши айтиб ўтилди.

Шу билан бирга, халқаро рейтингларда мамлакатимиз ўрни яхшиланган бўлса-да, уларнинг таркибий индикаторларидаги ўрнимиз пастлигича қолаётганлиги қайд этилиб, масъул вазирлик ва идоралар танқид қилинди.

Йиғилиш давомида Кенгаш ишчи органлари – молия вазири Т.Ишметов ҳамда адлия вазири ўринбосари Х.Мелиев Ўзбекистон Республикасининг ижтимоий-иқтисодий ва сиёсий-ҳуқуқий соҳаларга оид устувор халқаро рейтинг ва индекслардаги ўрнини яхшилаш бўйича 2021 йилга мўлжалланган чора-тадбирлар режалари лойиҳалари тўғрисида ахборот бердилар.

Хусусан, жорий йил давомида 7 та стратегия, 21 та қонун, 2 та концепция, 35 та норматив-ҳуқуқий ҳужжат лойиҳаларини ишлаб чиқиш кўзда тутилганлиги алоҳида таъкидлаб ўтилди.

Кенгаш ишчи органлари томонидан устувор халқаро рейтингларга масъул вазирлик ва идораларнинг амалга ошираётган ишлари самарадорлигини ошириш бўйича қатор таклифлар билдирилди.

Жумладан, вазирлик ва идораларнинг ихтисослашган таркибий бўлинмалари ходимлари учун халқаро рейтинглардаги мамлакатимизнинг кўрсаткичларини лойиҳавий бошқарувнинг халқаро стандартлари асосида яхшилаш бўйича махсус амалий-малака ошириш курсини ташкил этиш лозимлиги таклиф қилинди.

Шунингдек, ҳар бир рейтинг эълон қилиниши билан вазирлик ва идораларнинг ихтисослашган таркибий бўлинмалари ходимлари иштирокида рейтинг натижалари муҳокамасига бағишланган семинарларни ўтказиб бориш айтиб ўтилди.

Йиғилиш якунида Кенгаш аъзолари томонидан билдирилган фикр-мулоҳазалар ва таклифларни инобатга олиб, Кенгашнинг тегишли қарори қабул қилинди.