Депутат Дониёр Ғаниев Ички Ишлар вазирлиги поликлиникасида куни кеча давлат рўйхатидан ўтказилган ўзбек ва хитой олимлари ҳаммуаллифлигида яратилган ZF-UZ-VAC 200 рекомбинант вакцинасини биринчилардан бўлиб кўнгилли тарзда қабул қилди
Бундан асосий мақсад, ушбу вакцинани хавфсиз ва самарали эканлигини тарғиб қилишда иштирок этиш ҳамда сўнгги кунларда халқимиз орасида пайдо бўлган “янги вакцина хавфсизми?” каби саволларга ўз муносабатимни билдиришдир, дея ўз хулосаларини баён қилди депутат.
"Эмланиш жараёнида қон босими, юрак уруши, турли аллергик касалликларга мойиллик каби бир нечта тиббий кўриклардан ўтдим, вакцинани қабул қилгандан сўнг бир муддат шифокорлар кузатувида бўлдим ва барча ҳолатлар ижобий бўлгач кетишга руҳсат беришди. Умуман жараён жуда ҳам оддий ва хавфсиз ўтказилди.
Яқин кунларда Ўзбекистон бўйлаб COVID-19 коронавируси пандемиясига қарши оммавий эмлаш жараёнлари бошланиши кутилмоқда. Ушбу жараёнларда барча қўрқмасдан вакцинани қабул қилиши мумкин. Умид қиламанки, оммавий эмлаш жараёнларида миллионлаб ҳамюртларимиз вакцинани қабул қилишади ва оммавий иммунитетни яратиб, бу касалликни биргаликда енгамиз.
ZF-UZ-VAC 200 рекомбинант вакцинаси яратилишида ўзбек олимларининг ҳиссаси борлиги аввал ҳам таъкидлаганимиздек, мамлакатимиз олимларининг катта ютуқларидан бири бўлди ҳамда илм-фан соҳасида бундан кейинги ютуқлар учун илк қадам бўлса ажаб эмас", - яхши ният қилган Ғаниев.
