Бухоро вилояти божхона бошқармаси ахборот хизматининг маълум қилишича, Президентнинг Бухорога ташрифи чоғида вилоятда темир дафтарга кирганларни иш ўринлари билан таъминлаш, уларни маиший хизматлар кўрсатиш соҳаларига жалб қилиш мақсадида бўшаган юк контейнерларини замонавий кўринишда жиҳозлаган ҳолда, аҳоли пунктларида ўрнатиш чораларини кўриш топшириғи берилган.
Мазкур кўрсатма асосида вилоят ҳокимлиги, божхона бошқармаси ҳамда «Ремонт механика» заводи билан ҳамкорликда ишчи гуруҳи тузилиб, ҳозирги кунга қадар республикамизнинг турли ҳудудларидан 1000 донага яқин контейнерлар йиғилмоқда. Улар замонавий кўринишда таъмирланиб ва жиҳозланиб, имтиёзли кредит асосида вилоятдаги ижтимоий ёрдамга муҳтож оилаларга тарқатилмоқда.
