«Реал» бош мураббийи Зинедин Зидан Криштиану Роналдунинг Мадридга қайтиши имкониятлари ҳақидаги саволга жавоб қайтарди.
«Роналду қандай даражадаги ўйинчи эканлигини, нималарга эришгани ва уни Мадридда қай даража яхши кўришларини барчамиз яхши биламиз. Роналду «Реал»да тарих ёза олган ажойиб ўйинчи. Аммо у ҳозирда «Ювентус» футболчиси. Шундай экан, Криштиану ҳақида ортиқча гапириш ноўрин бўлади», - дея «Реал» бош мураббийи сўзларини келтирмоқда As нашри.
Аввалроқ, Роналдунинг агенти Жорже Мендеш «Реал» клуби президенти Флорентино Перес билан португалияликнинг Мадридга қайтиши имкониятлари масаласида гаплашгани ҳақида хабар қилинганди.
Эслатиб ўтамиз, Роналду 2009-2018 йиллар давомида «Реал» шарафини ҳимоя қилиб, 450та гол билан клуб тарихидаги энг яхши голеадорга айланганди. У «Реал» билан 4 марта Чемпионлар лигаси ғолиби бўлганди.
