"Ўзбекистон ҳаво йўллари" 28 мартдан бошлаб Урганч-Истанбул-Урганч йўналиши бўйича ҳафтасига 2 маротаба мунтазам рейсларни очмоқда, деб хабар беради Ўзбекистон транспорт вазирлиги.
Самолёт 28 март куни маросимдан сўнг Урганч халқаро аеропортидан маҳаллий вақт билан соат 09: 30да биринчи парвозига жўнайди.
Шу билан бирга 29 мартдан бошлаб авиакомпания бир йиллик танаффусдан сўнг 2017 йил ноябрида очилган, аммо пандемия сабабли 2020 йил март ойида тўхтатилган Самарқанд-Истанбул рейсларини давом эттиради. Рейслар ҳафтасига уч марта амалга оширилади.
Эслатиб ўтамиз, ўтган ҳафта Туркия Ташқи ишлар вазири Мевлут Чавушўғли Ўзбекистонга ташрифи чоғида икки мамлакат ўртасидаги транспорт алоқаларини соддалаштириш ва "Туркиш Aирлинес", "Узбекистан Aирлинес" ва хусусий авиакомпанияларнинг парвозлари ва йўналишларини кўпайтириш масалалари икки давлат томонидан мақулланган эди.
