Танзания собиқ вице-президенти Самия Сулуҳу Ҳасан мамлакат президенти сифатида қасамёд қилди, дея ёзмоқда rbc.ru.
"Мен, Самия Сулуҳу Ҳасан, ҳалол бўлишга, Танзания Конституциясига бўйсунишга ва уни ҳимоя қилишга ваъда бераман", деди у мамлакатнинг энг йирик шаҳри Дар-эс-Саламда бўлиб ўтган маросимда.
Самия Сулуҳу Ҳасан Танзаниянинг аввалги президенти 61 ёшли Жон Магуфули 17 март куни вафот этгач, ушбу лавозимни эгаллади. Танзания Конституциясига кўра, у Магуфулининг 2025 йилда тугайдиган иккинчи беш йиллик муддатининг қолган қисмида ишлайди. Сулуҳу ушбу Африка мамлакатидаги биринчи аёл давлат раҳбари бўлди. Шунингдек, у яна бир муддат президентликка номзодини қўйиши мумкин.
