Олий Мажлис Қонунчилик палатаси депутати Дониёр Ғаниевнинг маълум қилишича, сал аввал унга давлат телеканалларида “запрет”га тушгани ҳақида хабар берилган:
"Бугун Яшнобод туман паспорт столида МТРК каналларидан бирида ишловчи журналист билан тасодифан учрашиб қолиб, у билан ўтган ой йўл ҳаракати қоидабузарликларини фуқаролар томонидан телефонлар орқали қайд этиш масаласида муносабат билдириб, берган интервьюм ҳақида сўрагандим.
Шунда журналист қиз интервью эфирга узатилмаганини, бунинг сабаби сифатида эса у ишлайдиган каналда мен “запрет”да эканлигим билан изоҳлади".
Шундан сўнг, депутатнинг ушбу хабари турли баҳс ва муҳокамаларга сабаб бўлди ва кейинчалик вазият бундай эмас эканлиги маълум бўлган.
"Очиғи бу гапдан ўзим ҳам ҳайрон бўлиб, ишонмадим. Лекин журналист айтган гапдан ҳам ажабланиб, ҳам ишонмай, Twitterда бу воқеа ҳақида ҳазиломуз тарзда ёзгандим. Бундан хабар топган МТРК маъсуллари боғланиб, менга нисбатан ҳеч бир каналда расмий ёки норасмий “запрет” йўқлигини ҳамда мен гаплашган журналист нотўғри ва ёлғон маълумот берганини маълум қилдилар. Исбот сифатида, шу ойнинг ўзида "Ўзбекистон 24" каналида бир нечта интервьюларим эфирга кетгани айтилди.
Ҳақиқатдан, шахсан давлатимиз раҳбари томонидан сўз эркинлиги рағбатлантирилиб, ОAВ билан эркин мулоқотлар йўлга қўйилаётган бугунги кунда эскилик сарқити бўлмиш “запрет”ларга жамиятимизда ўрин йўқ, деб биламан.
Тасдиқланмаган ва расмий маълумотга асосланмаган ҳолда ўйламай ёзган твитим орқали кимлардадур нотўғри фикр ёки хулоса шаклланишига сабабчи бўлган бўлсам , яна бир бор узр сўрайман", - деб ёзиб қолдирди Ғаниев.
