Бугун, 23 март куни, Ўзбекистон Миллий матбуот марказида “Тошкент ер усти метросининг иккинчи босқичини фойдаланишга топшириш борасида белгиланган устувор вазифалар” мавзусида матбуот анжумани бўлиб ўтди. Бу ҳақда Ўзбекистон темир йўллари АЖнинг Aхборот-таҳлилий медиа маркази маълум қилди.
Унда “Ўзбекистон темир йўллари” AЖнинг мутасадди раҳбарлари ҳамда темир йўл тизими тасарруфидаги Тошкент ер усти метроси қурилишининг иккинчи босқичини амалга оширишда фаолият олиб бораётган “Кўприкқурилиш трести” УК мутахассислари иштирок этди.
Матбуот анжуманда таъкидланганидек, Ўзбекистон Республикаси Президентининг 2017 йил 19 майдаги “Тошкент шаҳрида ер усти ҳалқа метро линияларининг қурилиши” лойиҳасини амалга ошириш чора-тадбирлари тўғрисида”ги қарори ижросини таъминлаш мақсадида “Ўзбекистон темир йўллари” акциядорлик жамияти томонидан Тошкент шаҳрида ер усти ҳалқа метрополитени линиясининг 2-босқичини қуриш ишлари режали ва жадал сураътларда давом эттирилмоқда.
Aнжуманда “Ўзбекистон темир йўллари” AЖнинг Капитал қурилиш дирекцияси бошлиғининг ўринбосари Aзизбек Aбдиев таъкидлаганидек, Тошкент ҳалқа ер усти метро йўлининг 2-босқичи Қўйлиқ бозоридан Тошкент шаҳрининг Миробод ҳамда Сергели туманидан ўтган Катта ҳалқа йўли, Тошкент вилоятининг Зангиота туманидаги Хонобод кўчаси ҳамда Сергели туманининг Қипчоқ кўчасидан ўтиб, Сергели линиясининг 5-бекатига уланади ҳамда Янги ҳаёт туманига етказилади. 15 километрлик умумий узунликка эга ушбу участкада 9 та бекат қуриш режалаштирилган. Мазкур ҳудуддан ўтаётган янги метро участкаси фойдаланишга топширилгач, фақатгина ушбу йўналишда кунига 46 минг йўловчи ташилиши режалаштирилган. 700га яқин янги иш ўрни ҳам яратилади. Лойиҳанинг ҳозирги босқичдаги қурилиш ишларига 150дан ортиқ махсус техника, машина ва механизмлар ҳамда 3 минг 500 нафарга яқин малакали муҳандис ва ишчи-ходимлар жалб қилинган.
Журналистлар томонидан қурилиш жараёнида бажарилаётган ишлар сифати бўйича берилган саволга мутасадди мутахассислар, Давлат архитектура ва қурилиш назорати инспекцияси ҳамда “Ўздавтемирйўлназорат” инспекцияси мутахассислари томонидан мунтазам назорат олиб борилишини алоҳида қайд этдилар. Шунингдек, барча қурилиш ишлари белгиланган тармоқ жадвали асосида амалга оширилиб келинаётганини ҳам таъкидланди.
Учрашувда иштирок этган мутахассислар шунингдек, режага кўра Тошкент ҳалқа ер усти метрополитени линияси мавжуд Ўзбекистон, Сергели, Чилонзор ҳамда Юнусобод йўналишларига тўғридан-тўғри улананишини ва бошқа Тошкент шаҳридаги қурилаётган ер усти метрополитенининг қурилишига оид истиқболли режалар ҳақида тўхталиб ўтдилар.
Оммавий ахборот воситалари вакиллари томонидан берилган бу ва бошқа қатор саволларга атрофлича жавоб берилди.
