АҚШ президенти Жо Байден Россия президенти Владимир Путин билан Хитой раҳбари Си Цзиньпинни иқлим бўйича музокаралар ўтказишга таклиф этди, деб маълум қилади Associated Press Оқ уй расмийлари берган маълумотга таяниб.
Саммитда кўриладиган масалаларнинг тафсилотлари ҳозирча номаълум. Агентликнинг таъкидлашича, гап Байден президент бўлгандан буён ушбу масалада биринчи бор олий даражада кенг қамровли музокаралар ўтказиш ҳақида бормоқда.
Жо Байденнинг баёнот беришича, у ҳозирча ушбу масалани россиялик ва хитойлик ҳамкасблари билан муҳокама қилгани йўқ.
Аввалроқ АҚШ 22-23 апрель кунлари онлайн-форматда иқлим муаммоларига бағишланган халқаро саммит ўтказишни режалаштириётгани ҳақида хабар берилган эди. АҚШ ҳукуматининг маълум қилишича, тадбир атроф муҳитга зарарли чиқиндиларни чиқаришни камайтириш масалаларига бағишланади.
