ССВ Матбуот хизматининг полиомиелит касаллиги бўйича саволларига вазирлик қошидаги Санитария-эпидемиологик осойишталик ва жамоат саломатлиги хизмати бўлим мудири Дилором ТУРСУНОВА жавоб берди.
— Минтақамизда полиомиелит касаллиги тарқалиши аввал ҳам кузатилганми?
— Мамлакатимизда полиомиелит касаллиги билан оғриган бемор охирги марта 1995 йилда қайд этилган. Бу йўналишда олиб борилган қатъий санитария ҳолатни яхшилашга қаратилган чора-тадбирлар орқали Ўзбекистон Республикаси 2002 йилда “Полиомиелитдан ҳоли бўлган ҳудуд” деган сертификатга эга бўлди.
Қўшни Тожикистон ҳудудида эса, 2010 йилда ҳам ўткир юқумли полиомиелит касаллиги, поливируснинг биринчи типига чалинган бемор аниқланган. Ўша пайтда олиб борилган тезкор эҳтиёт чоралари сабабли бу хасталик мамлакатимизга кириб келмади.
2010 йилда мамлакатимиздаги барча беш ёшгача бўлган болалар ҳамда Сурхондарё вилоятидаги 35 ёшгача бўлган аҳоли полиомиелит касаллигига қарши эмланган эди.
