Телеграм каналларда Бухоро шаҳар Ҳамза кўчаси ёқасида қурилаётган қурилиш объекти ҳолати тасвирланган лавҳалар пайдо бўлди. Унда қурилиш бўлаётган бинодан ғиштларнинг қулагани акс этган.
Қурилиш соҳасида ҳудудий назорат инспекцияси мутахассислари томонидан ҳолат ўрганиб чиқилди.
Маълум бўлишича, Бухоро шаҳар Хамза кўчаси ёқасида “IMPALA COLLECTION BUSINESS” масъулияти чекланган жамиятига 1-қаватида савдо маиший хизмат кўрсатиш ва юқори қаватлари кўп хонадонли турар жой биноси қурилиши учун шаҳар ҳокимининг 2018 йил 7 сентябрдаги 2849-сонли қарори асосида рухсат берилган. “IMPALA COLLECTION BUSINESS” МЧЖ 2020 йил 1 декабрда Давлат хизматлари агентлиги орқали Бухоро вилояти қурилиш бошқармасига АРТ (архитектура режалаштириш топшириғи) ҳужжатини расмийлаштириш учун тегишли тартибда мурожаат қилган ҳамда бошқарма томонидан 1706-17066401-6810-сонли АРТ тайёрлаб берилган. Лойиҳа ташкилоти “Аркада архстрой сервис” МЧЖ томонидан ишлаб чиқилиб, келишилган бош режа концепцияси жойлашуви асосида қурилиш монтаж ишлари олиб борилган. Ушбу МЧЖ томонидан қурилаётган объектнинг тасдиқланган лойиҳа-смета ҳужжатлари, экспертиза хулосаси ҳамда Қурилиш соҳасида ҳудудий назорат инспекциясидан қурилишни бошлаш учун хабарнома ҳужжатини расмийлаштирмасдан ишлар бажарилганлиги учун инспекция 2020 йил 14 сентябрь куни қурилишни тўхтатиш ҳақида 51-сонли ёзма кўрсатма берган.
Шаҳарсозлик ҳужжатларини расмийлаштиргунга қадар қурилиш ишларини вақтинчалик тўхтатишга испекция томонидан берилган кўрсатмага амал қилмай объектда ишларни давом эттирганлиги учун эса Ўзбекистон Республикаси Маъмурий жавобгарлик тўғрисидаги Кодекси 99-моддасининг тегишли банди билан “IMPALA COLLECTION BUSINESS” МЧЖ масъул шахсини маъмурий жаримага тортиш бўйича тайёрланган ҳужжатлар суд органига тақдим этилди.
