Яқинда Чилонзор туманидаги 16-шаҳар шифохонаси маст фуқаро шифокорни калтаклагани хабар берилган эди. Халқ депутатлари Тошкент шаҳар Кенгаши депутатлари ҳамда Ўзбекистон «Адолат» СДП Тошкент шаҳар Кенгаши ишчи гуруҳи ушбу хабарга ойдинлик киритиб, ҳақиқий ҳолатни ўрганиш мақсадида воқеа жойига етиб борди. Бу ҳақда "darakchi.uz"га Ўзбекистон «Адолат» СДП Тошкент шаҳар Кенгаши матбуот хизмати хабар берди.
Маълум қилинишича, 24 март куни кеч соат 23:15 ларда Республика шошилинч тиббий ёрдам илмий марказининг токсикология қабул бўлимига пойтахтнинг Олмазор туманида истиқомат қилувчи 37 ёшли фуқаро У.Н онаси ҳамрохлигида текширувга олиб келинган. Беморнинг онаси токсиколог хонасида ўз хизмат фаолиятини ўтаётган навбатчи шифокор Н.Тошпўлатовага ўғли бир неча кундан бери спиртли ичимлик ичаётганганини билдирган. Навбатчи шифокор ўша вақтда бошқа беморни тиббий кўрикдан ўтказаётганлигини ва бундан сўнг уларни ҳам қабул қилиб керакли ёрдам кўрсатишга тайёрлигини айтган. Шунга қарамай, беморнинг онаси тиббиёт ходимларига нисбатан турли ҳақоратли ва тухмат сўзлар билан эътироз билдиришни бошлаган. Бу ҳам етмагандек, фуқаро У.Н тўсатдан Н.Тошпўлатовага оғир тан жарохати етказган. Етказилган тан жарохати натижасида шифокор аёлнинг бош мияси шишиб, бурун ва энса суяклари синган ва лат еган. Айни пайтда у оғир ахволда шифохонанинг нейрохирургия бўлимида даволанмоқда экан.
Устига устак бунақа ҳолат 26 март куни соат 23:43 да пойтахтимиздаги «103» диспетчерлик хизматига Миробод туманида истиқомат қилувчи 19 ёшли фуқаро А.дан чақириқ келиб тушганда ҳам содир бўлган. Кўрсатилган манзилга тез тиббий ёрдам бригадаси 7 дақиқа ичида зудлик билан етиб борган бўлишига қарамай 1995 йилда туғилган шифокор Б.Хазратовга тўсатдан ташланиб, бошига қаттиқ жисм билан урилган. Натижада шифокорнинг бош мияси оғир жарохат олган. Хозирда Республика шошилинч тиббий ёрдам илмий марказининг нейрореанимация бўлимида оғир ахволда ётибди – деб депутатларга маълумот тақдим этилди.
Бундай ҳодисаларнинг содир этилаётганига тиббий маданиятнинг кенг омма ўртасида етарли даражада шакланмаганлиги, ношукрлик, жохиллик каби иллатларнинг авж олиши асосий сабаблардан биридир. Ҳеч бўлмаганда пандемия сабоқлари шифокорларнинг биз учун нақадар қадрли ва қимматли эканлигини англатиб туриши лозим. Бутун дунёни чулғаб олган балои офатни бартараф этишда кеча-ю кундуз тиним билмаган шифокорларнинг ҳаётимиздаги ўрни нечоғли юксак эканлигини чуқур ҳис этишимиз зарур. Яна аёлдек мўътабар зотни уриш бу - шифокорларга тазйиқ кўрсатишнинг юқори чўққига чиққанлигини англатмоқда. Бугун давлатимиз томонидан хотин-қизларни турли тазйиқ ва зўравонликлардан ҳимоя қилишга алоҳида диққат-эътибор қаратилаётганлиги барчамизга сир эмас. Аёл шифокорни калтаклаш эса учига чиққан жохиллик ва тубанликдир. Бундай кимсаларга жазо турини кучлироқ жорий этиш керакки, қолганлар бундан намуна олсин. Нима бўлган тақдирда ҳам кимнидир уриш, ҳақоратлаш қонунда қатъиян ман этилган. Афсуски, жамиятимиз кишилари вазиятни оқилона, қонуний ҳал этиш ўрнига кимнидир дўппослаш ва шу йўл билан «попугини пасайтириб қўйиш»ни афзал билади. Бу эса мамлакатимизда олиб борилаётган одилона сиёсат ва ислоҳотларга ўзининг салбий таъсирини кўрсатмасдан қолмайди.
Депутатлар мазкур ўрганишларда шифокорларнинг ўринли эътирозларига дуч келишди. Улар қуруқ гаплардан чарчаганликларини, бир неча йилдан буён айтиб келинса-да шифокорларни ҳимоя қилиш бўйича қонун қабул қилинмаётганлиги, иш фаолиятларида юқоридаги каби зўравонликлардан сақланиш бўйича хавфсиз аниқ механизм йўқлигини таъкидлашди. Хатто кўпчилик шифокорлар бундай ҳолатларнинг тез-тез содир этилаётганлиги боис тунги навбатчиликка қолишдан бош тортаётган экан.
Ўрганишлардан хулоса қилиб, маҳаллий Кенгаш депутатлари мазкур масала бўйича муаммони юқори турувчи Қонунчилик палатаси депутатларига таклиф сифатида юборишни мақсад қилди.
