Бу ҳақда АОКАда Коррупцияга қарши курашиш агентлиги мутасаддилари иштирокида ўтказилган матбуот анжуманида маълум қилинди.
«Вазирлик ва идораларда «комплаенс назорат» тизими жорий этилиши орқали салмоқли натижалар қайд этилди. Масалан, «Ўзкимёсаноат» АЖ тизимида коррупциянинг олдини олиш мақсадида тўғридан-тўғри сотиб олиш амалиётига чек куйилиши натижасида жорий йил 15,3 млрд сўм иқтисод қилинишига эришилган. Бундан ташқари, «Қўнғирот сода заводи» АЖда 9 млрд сўмлик 4,5 минг тайёр маҳсулот камомади борлиги аниқланган ва қонуний чора кўриш учун ҳужжатлар ҳуқуқ-тартибот органларига юборилган.
Халқ таълими тизимида жами 78 млрд сўм молиявий хато ва камчиликлар, ноқонуний ўзлаштиришлар аниқланиб, қонуний чора кўриш учун ҳуқуқ-тартибот органларига юборилган. Шунингдек, қонунбузилиши ҳолатларига йул қўйган 214 нафар мансабдор шахсга нисбатан интизомий жазо чоралари қўлланилган, 34 нафар масъул мансабдор эгаллаб турган лавозимидан озод этилган.
