Ижтимоий тармоқларда солиқ органи ходимлари сотувчи аёлларнинг буюмларини тортиб олишга уриниб, ерда судрагани акс этган видео тарқалди.
Видеода солиқчилар кўчада сотувчилик қилаётган аёлларнинг буюмларини тортиб олиб, машинага юклашга урингани акс этган. Aёллардан бири буюмларини беришни хоҳламаган, солиқ органи ходими уни ерда судраб, сумкасини мажбуран олиб қўйгани, онасини ҳимоя қилаётган болакайни кўришингиз мумкин.
«Уйимда нон қолмади, бер нарсаларимни», дея бақиради сотувчи аёл.
Давлат солиқ қўмитаси Раиси Шерзод Кудбиев солиқ ходимлари сотувчилик орқали кун кўрувчи аёлларнинг буюмларини олиб қўйгани юзасидан видео муносабат билдирди.
«Солиқ органлари кучишлатар идора эмас, балки тадбиркорларга кўмакчи бўладиган ташкилот. Бундай ҳолат юз бергани учун бутун халқимиздан узр сўрайман», деди қўмитаси Раиси.
Давлат солиқ қўмитаси раисининг видео баёнотига кўра, воқеа Олмалиқда содир бўлган. Мазкур ҳолатни шахсан ўзи ҳудудга бориб ўрганишини, айбдорларга нисбатан қатъий чоралар кўрилишини таъкидлади.
