Якка тартибда таълим олаётган ўқувчи учун қандай шароитлар яратилган? Инклюзив таълим асосида ўқувчининг пухта билим олиши, ўқитувчининг сифатли таълим-тарбия беришида қандай самарали чора-тадбирлар ишлаб чиқиш мумкин?
Халқ таълими вазири Шерзод Шерматов Самарқанд вилояти Пахтачи туманидаги 18-мактабнинг 8-синф ўқувчиси, уйида якка тартибда таълим олаётган Сабина Бобоқулова хонадонида бўлиб, ушбу масалаларга алоҳида эътибор қаратган. Бу ҳақда вилоят Халқ таълими бошқармаси маълум қилди.
Вазир ўқувчи ва унинг ўқитувчилари, ота-онаси билан суҳбатлашиб, уларнинг фикрларини эшитди. Сабинанинг орзу-умидлари билан ўртоқлашди.
Сабинанинг яхши таълим-тарбия олиши, касб-ҳунар ўрганишига етарлича шароит яратиш, ижтимоий қўллаб-қувватлаш мақсадида китоблар жамланмаси ва тикув машинаси совға қилинди.
