Зангиотада даволанаётган беморларга вакцинация қилинмайди. Бу ҳақда Коронавирусга қарши курашиш штаби аъзоси Севара Убайдуллаева маълум қилди.
Вакциналар – касалликни олдини олишга қаратилган воситалар бўлиб, уларни инсон организмига юбориш учун энг муҳим омил – соғлом даврда бўлишликдир, яъни ўткир ёки сурункали касалликларни тинч даврида эмлашни ўтказиш керак.
Вакцинация икки хил вақтда:
- коронавирус инфекцияси билан умуман касалланмаган, яъни организмга инфекция тушмаганда;
- инсон организмига инфекция тушган, касалланиб тузалган ва 3 ёки 6 ёки 9 ой ўтиб, қонда касалликка қарши ишлаб чиқилган антитаначалар титри камайган ёки умуман тушиб кетган ҳолатларда эмлашни ўтказиш тавсия этилади.
Зангиотада коронавирус касаллиги билан оғир ҳолатда даволанаётган беморлар организмига афсуски, инфекция тушиб бўлган ва касаллик ўткир ёки ўткир ости даврида, шунингдек, беморлар организмида касаллик оқибатидан оғир жараён кечаётган даври бўлиб, бу даврда эмлаш тавсия этилмайди.
Организмга коронавирус инфекциясини тушиши, касалликни бошланишини билдиради ва бу беморларга бу вақтда вакцинация эмас, балки тасдқиланган протоколлар асосида даволаш муҳимдир.
